Kur jepet sadakaja e Fitrit?
Koha e dhënies së sadakasë së Fitrit fillon me perëndimin e diellit të ditës së fundit të Ramazanit, e cila është nata e Bajramit. Ndërsa caku i mbarimit është koha e namazit të Bajramit. Mirëpo, nëse agjëruesi për arsye të ndryshme e ka të vështirë dhënien e kësaj sadakaje në kohën e lartpërmendur, atëherë i lejohet ta japë atë një ose dy ditë para mbarimit të muajit të Ramazanit. Ashtu siç vepronte sahabiu i nderuar Ibn Omeri -radiallahu anhu- i cili e jepte sadakanë e Fitrit një ose dy ditë para Bajramit.[1]
Kush e ka detyrë të japë sadakanë e Fitrit?
Sadakaja e Fitrit është detyrë për çdo person musliman i cili i ka mundësitë që ta japë këtë sadaka. Kryefamiljari duhet të japë për veten dhe për gjithë anëtarët e familjes. Ibn Omeri -radiallahu anhu- ka thënë: “Profeti (paqja dhe bekimet e Zotit qofshin mbi të) ka obliguar që sadakaja e Fitrit të jepet për çdokënd nga muslimanët, qoftë ai rob apo i lirë, mashkull apo femër, i vogël apo i madh.”[2]
Cilat janë llojet e ushqimeve që jepen për sadaka Fitri?
Duhet të dimë se llojet e ushqimeve që janë të vlefshme për t’u dhënë sadaka Fitri janë ushqimet bazë të cilat konsumohen nga banorët e atij vendi. Në kohën e Profetit (paqja dhe bekimet e Zotit qofshin mbi të) ushqimet bazë ishin: gruri, elbi, hurma arabe, qumështi pluhur, rrushi i thatë etj.
Në kohën tonë ushqimet bazë janë: orizi, makaronat, mielli, fasulet etj.
Sasia e ushqimit që duhet të jepet për çdo individ të familjes është afërsisht 2.4 kg.
—————————————————————
[1] Shiko Sahihun e Buhariut, hadithi me nr. 1440.
[2] E transmeton Buhariu me nr. 1433 dhe Muslimi me nr. 984.