Çfarë është Imani (besimi) dhe Islami?

(1) Kapitulli i Imanit (besimit): Çfarë është besimi dhe sqarimi i përbërësve të tij

Hadithi i Ebu Hurejrës, i cili transmeton se Profeti ﷺ një ditë u shfaq para njerëzve dhe aty iu afrua një burrë që e pyeti:
“Çfarë është imani (besimi)?”
Ai tha: “Imani është që të besosh në Allahun, në engjëjt e Tij, në takimin me Të, në të dërguarit e Tij dhe të besosh në ringjalljen.”
Ai pyeti: “Çfarë është islami?”
Profeti tha: “Islami është që të adhurosh Allahun dhe të mos i shoqërosh Atij asgjë, të falësh namazin, të japësh zekatin e detyrueshëm dhe të agjërosh Ramazanin.”
Ai pyeti: “Çfarë është ihsani?”
Ai tha: “Të adhurosh Allahun sikur po e sheh Atë; sepse edhe nëse ti nuk e sheh Atë, Ai të sheh ty.”
Ai pyeti: “Kur është ora (Kiameti)?”
Ai tha: “I pyeturi nuk di më shumë rreth saj sesa pyetësi. Por do të të tregoj për shenjat e saj: kur shërbëtorja të lindë zotërinë e saj, dhe kur barinjtë e deveve të zbathur e të zhveshur të garojnë në ndërtimin e godinave të larta. Ajo është e përfshirë tek pesë gjërat që nuk i di askush përveç Allahut.”
Pastaj recitoi ajetin: “Pa dyshim, vetëm Allahu e di Orën e caktuar.” Lukman: 34.

Pastaj njeriu u largua.

Profeti ﷺ tha: “Kthejeni atë!”
Por nuk panë askënd. Atëherë ai u tha: “Ai ishte Xhibrili, erdhi t’jua mësojë fenë tuaj.”

E transmeton Buhariu në:
Libri i Imanit, kapitulli 37: Pyetja e Xhibrilit drejtuar Profetit ﷺ për Imanin dhe Islamin.
—
(3) Kapitulli për sqarimin e namazeve që janë një nga shtyllat e Islamit

Hadithi i Talha ibn Ubejdillah, i cili tregon: Një burrë nga banorët e Nexhdit erdhi te i Dërguari i Allahut ﷺ me flokë të shpupurisura, dhe dëgjohej zëri i tij i lartë, por nuk kuptohej çfarë thoshte, derisa u afrua dhe rezultoi se po pyeste për Islamin.

Profeti ﷺ i tha: “(Janë) pesë namaze në ditë e natë.”
Ai pyeti: “A kam detyrim tjetër përveç tyre?”
Profeti ﷺ tha: “Jo, përveç nëse dëshiron të kryesh namaze vullnetare.”

Pastaj i përmendi agjërimin e Ramazanit.
Ai pyeti: “A kam obligim tjetër përveç tij?” Tha: “Jo, përveç nëse dëshiron të agjërosh vullnetarisht.”

Pastaj Profeti ﷺ i përmendi edhe zekatin.
Ai pyeti: “A kam obligim tjetër përveç tij?” Tha: “Jo, përveç nëse jep vullnetarisht.”

Pastaj burri u largua duke thënë: “Pasha Allahun, nuk do të shtoj asgjë mbi këtë, as nuk do të pakësoj.”

Atëherë i Dërguari i Allahut ﷺ tha: “Ka shpëtuar, nëse është i sinqertë!”

E transmeton Buhariu në:
Libri i Imanit, kapitulli 34: Zekati është prej Islamit.

—

Sqarime gjuhësore:

Bariz: i dukshëm, i shfaqur.

Rabbehâ: zotërinë e saj, pra pronarin apo mbikëqyrësin e saj.

Buhm: shumës i “ebhem”, që nënkupton dikë pa ndonjë shenjë të veçantë dalluese, ose njerëz të panjohur. Mund të nënkuptojë edhe “të zinjtë” apo “njerëzit e varfër” që nuk njihen në shoqëri.

“Pa dyshim, vetëm Allahu e di Orën e caktuar.”: Ajeti i plotë është: “Pa dyshim, vetëm Allahu e di Orën e caktuar. Ai e zbret shiun dhe e di ç’ka në barkun e shtatzënës. Asnjë njeri nuk di ç’do të fitojë nesër dhe askush nuk di se në ç’vend do të vdesë. Me të vërtetë, Allahu është i Gjithëdijshëm dhe Njohës i çdo gjëje.” Lukman: 34.

Tha’ir: me flokë të çrregullta, të shpupurisura.

Deuij: zë i lartë e i thellë që përhapet në ajër dhe nuk kuptohet qartë.

اللؤلؤ و المرجان

“Perlat dhe Koralet e haditheve në të cilat janë dakortësuar dy imamët” (Buhariu dhe Muslimi)

Përshtati: Fatjon Isufi

Dosje: imani, Islami