Ebu Hurejra tregon se Profeti sal-lAllahu alejhi ue sel-lem ka thënë: “Një burrë (prej atyre që kanë qenë para jush) bleu prej një burri tjetër një copë toke. Burri që bleu tokën gjeti në tokën e tij një shtambë me flori dhe i tha atij (që i kishte shitur tokën): Merre floririn tënd sepse unë kam blerë prej teje vetëm tokën dhe nuk kam blerë floririn. Ndërsa ai që e shiti tokën i tha: Unë ta shita tokën me çfarë ka brenda. Atëherë ata e ngritën çështjen tek një burrë tjetër dhe ai u tha: A keni fëmijë? Njëri prej tyre tha: Unë kam një djalë. Dhe tjetri tha: Unë kam një vajzë. Ai u tha: Martojeni djalin me vajzën, shpenzoni prej tij (florit) për ta dhe jepni sadaka.” E transmeton Buhariu, Muslimi etj.
Dobitë e përfituara nga kjo histori:
1- Porosia e Allahut për të gjithë profetët ka qenë të hanë hallall siç tregon Profeti sal-lAllahu alejhi ue sel-lem: “Allahu i ka porositur besimtarët siç i ka porositur profetët, dhe ka thënë: ‘O ju të dërguar, hani prej gjërave të mira dhe punoni punë të mira.’ | El Muminun: 51. Dhe ka thënë gjithashtu: ‘O ju që besoni, hani prej të mirave të cilat ju kemi furnizuar.’ | El Bekare: 172.” E transmeton Muslimi. Ibn Rexhebi thotë: Këtu për qëllim është se profetët dhe ymetet e tyre janë urdhëruar të hanë prej të mirave dhe që është hallall.
2- Devotshmëria e burrave karshi porosive të Allahut i bëri këta dy burra të bien në kundërshtim në lidhje me floririn e gjetur, sepse secili prej tyre druhej nëse do ta mbante shtambën se ndoshta po merrte atë që nuk i takon. Kjo do të thotë se porosia për devotshmëri është diçka e hershme dhe për këtë dëshmon dhe fjala e Allahut në Kuran: “Ne i porositëm ata që ishin para jush dhe juve që të keni frikë Allahun (të jeni të devotshëm).” | En-Nisa: 131.
3- Lënia e të dyshimtave është prej devotshmërisë sepse floriri i gjetur nuk ishte i qartë se kujt i përkiste, dhe kjo na kujton me fjalën profetike: “Hallalli është i qartë dhe harami është i qartë, por mes tyre ka gjëra të dyshimta që shumë nga njerëzit nuk i dinë ato. Ai që ruhet nga gjërat e dyshimta e ruan fenë dhe nderin e tij. Ai që bie në gjëra të dyshimta bie në haram, dhe është si shembulli i bariut që ruan kopenë rreth kullotës së ndaluar thuajse gati ka hyrë në të. Çdo mbret (sundimtar) ka nga një vend kullote të ndaluar për të tjerët, e vendi i Allahut i ndaluar janë haramet (ndalesat) e Tij. Në trup është një copë mishi që nëse është e mirë, trupi është mirë dhe ndreqet i tëri, e nëse është e keqe trupi është keq dhe prishet i tëri. E ajo (copë mishi) është zemra.” E transmeton Buhariu dhe Muslimi.
Ibn Rexhebi thotë: Në devotshmërinë e plotë hyjnë; kryerja e detyrave, lënia e të ndaluarave dhe lënia e të dyshimtave.
4- Kur njerëzit bien në kundërshtim për diçka është mirë që çështja e tyre të ngrihet tek një palë e tretë që është jashtë palëve të interesit, sepse njeriu kur është palë e kundërshtimit nuk gjykon drejt. Prandaj dhe në Kuran gjejmë se Allahu i udhëzon dy bashkëshortët kur kanë mosmarrëveshje ta ngrenë çështjen e tyre tek një palë e tretë e përbërë nga një përfaqësues i gruas dhe një përfaqësues i burrit. Pastaj Allahu thotë: “Nëse ata të dy duan t’i rregullojnë, Allahu u jep sukses.” | En-Nisa: 35.
5- Besimi i profetëve ka qenë një, kurse në rregullat sheriatike kanë pasur edhe ndryshime dhe ndoshta ky lajm tregon për këto ndryshime. Gjykimi për florinjtë e gjetur në islam është sipas kohës së cilës i përkasin: nëse janë groposur prej myslimanëve atëherë ato marrin gjykimin e mallit të humbur, i cili publikohet për një vit rresht e pastaj mund të përdoret, por në rast se del pronari duhet t’i dorëzohet atij. Nëse janë groposur prej jomyslimanëve të kohës së injorancës atëherë ato marrin gjykimin e thesareve të gjetura, ku një e pesta e tyre jepet sadaka dhe pjesa tjetër kalon në pronësinë e atij që e ka gjetur.
6- Sadakaja gjendet kudo që gjenden gjurmët profetike sepse ajo është shenjë besimi, siç thotë Profeti sal-lAllahu alejhi ue sel-lem: “Sadakaja është argument.” D.m.th. argument për besimin e njeriut. E transmeton Muslimi.
Përgatiti: Teuta Xeka
Dosje: hadith