Kopshtet e Xhenetit dhe Dëshirat që Nuk Shterojnë

💎 Kopshtet e Xhenetit dhe Dëshirat që Nuk Shterojnë

✍ Ebu Hurejra – Allahu qoftë i kënaqur me të – përcjell se Profeti ﷺ një ditë po fliste, dhe pranë tij qëndronte një burrë (nomad) nga banorët e shkretëtirës. Ai (Profeti ﷺ) tregoi: “Se një burrë prej banorëve të Xhenetit kërkoi leje nga Zoti i tij që të mbillte (të bënte punë bujqësie) në xhenet.

Allahu i Lartësuar i tha: ‘A nuk je tashmë në gjithçka që ti dëshiron?

Ai tha: ‘Po, por unë e dua mbjelljen.’

Kështu, ai e hodhi farën; dhe ajo menjëherë, sa hap e mbyll sytë, mbiu, u rrit, u drejtua, u pjek dhe u vol me fryte sa malet.”

Më pas Allahu i thotë: ‘Merri, o bir i Ademit, sepse asgjë nuk të ngop ty!

Beduini (duke komentuar) tha:

“Pasha Allahun, këtë (që do mbjellë në Xhenet) nuk do ta gjesh veçse një burrë nga Kurejshët ose nga Ensarët, sepse ata janë njerëz që mbjellin; kurse ne nuk jemi të tillë.” Profeti ﷺ kur e dëgjoi atë, qeshi.

📚 Transmeton Buhariu

✅ Shpjegimi i hadithit:

Ebu Hurejra tregon se Profeti ﷺ një ditë po fliste, dhe në mesin e të pranishmëve ishte një beduin që dëgjonte me vëmendje. Profeti ﷺ tregoi se njëri prej banorëve të Xhenetit i kërkoi Zotit të tij që ta lejonte të mbillte në xhenet.

Allahu i Lartësuar i tha: “A nuk je tashmë në gjithçka që ti dëshiron?” Ai u përgjigj:

“Po, por unë e dua mbjelljen.”

Ai e lejoi të mbillte. Kështu, njeriu hodhi farën, dhe ajo mbiu menjëherë, u drejtua, u rrit, u pjek dhe u vol – të gjitha brenda një çasti të vetëm – dhe çdo kokërr e frutave të saj ishte sa një mal.

Allahu i tha: “Merri, o bir i Ademit; sepse asgjë nuk të ngop ty.”

Beduini me thjeshtësinë e tij të njohur tha: “Pasha Allahun, këtë njeri që kërkon mbjellje nuk e gjen veçse tek Kurejshët ose Ensarët, sepse ata e duan mbjelljen; sa për ne, nuk e duam mbjelljen dhe nuk jemi njerëz që punojmë tokën.” Kështu, Profeti ﷺ qeshi.

✅ Mësime të nxjerra nga hadithi:

1. Në Xhenet gjendet çdo gjë që e dëshirojnë shpirtrat nga veprat dhe kënaqësitë e dunjasë.

2. Kush është i lidhur me një mënyrë apo gjendje të caktuar – qoftë në të mirë ose të keqe – lejohet të përshkruhet me të, dhe nuk ka ndonjë pengesë për atë që e përshkruan.

3. Mësojmë atë me të cilën Allahu i ka krijuar natyrat e bijve të Ademit, si dëshira për shtim dhe lakmia ndaj të mirave të dynjasë – e megjithatë Allahu i ka liruar banorët e Xhenetit nga mundimi dhe lodhja e dunjasë.

4. Hadithi sikur kërkon të vërë në dukje virtytin e kënaqësisë (kana’a) dhe qortimin e lakmisë së tepruar.

5. Hadithi flet për një çështje të sigurt që do të ndodhë, por e sjell me foljen në kohën e shkuar (për forcim kuptimi).

“Ed Durar es Senije”

Përshtati: Fatjon Isufi

Dosje: Vendbanimet e banorëve të xhenetit