(Sahih)[1] Na ka treguar Hisham bin Amar nga Jahja bin Hamzeh, nga Burdu bin Sinan, nga Is’hak bin Kabisah, nga babai i tij se Ubadeh bin es-Samet el Ensarij, shoku i të Dërguarit të Allahut sal-lAllahu alejhi ue sel-lem i cili luftoi bashkë me Muauijen në tokën romake (kundër romakëve), i pa njerëzit të blinin copën e arit me dinarë dhe copën e argjendit me dirhem. Ai u tha: “O njerëz, ju jeni duke ngrënë kamatën. Unë e kam dëgjuar të dërguarin e Allahut sal-lAllahu alejhi ue sel-lem të thotë: Mos e blini arin me ar veçse me të njëjtën masë, duke mos shtuar mes tyre e as duke pritur (e vonuar).”
Muauija i tha atij: O Ebu Uelid! Unë nuk shoh se ka kamat në këtë gjë veçse nëse lihet me t’u pritur. Ubadeh i tha: Unë po të tregoj hadithin nga i Dërguari i Allahut sal-lAllahu alejhi ue sel-lem ndërsa ti më tregon se çfarë mendon? Nëse Allahu më largon nga këtu unë nuk do të jetoj një një tokë ku ti je prijës. E kështu me rastin e parë që gjeti karvan ai u nis për në Medine. Umer bin Hatabi i tha: O Ebu Uelid! Ç’e mirë të solli këtu? Aii i tregoi Umerit atë që kishte ngjarë mes tij dhe Muauijes dhe se çfarë i tha ai atij për qëndrimin në një vend ku Muauije është prijës. Umeri i tha: O Ebu Uelid! Kthehu në tokën (vendin) tënde. Allahu e shëmtoftë atë tokë që nuk ka një si ti dhe njerëz si puna jote! Pastaj (Umeri) i shkruajti Muauijes duke i thënë: Ti nuk ke pushtet mbi të, ndërsa njerëzit urdhëroi që të punojnë në bazë të asaj që ai (Ubadeh) ka thënë, sepse në lidhje me këtë (çështje) atij i takon të vendos (urdhërojë).”[2]
19/20[3] (Sahih) Na ka treguar Muhamed bin Beshar nga Jahja bin Seid, nga Shubeh, nga Amër bin Murrah, nga Ebu el-Buhterij, nga Ebu Abdurrahman es-Sulemij, nga Ali bin Ebi Talib se ka thënë: “Kur t’ju tregohet ndonjë hadith nga i Dërguari i Allahut sal-lAllahu alejhi ue sel-lem ju mendoni atë që është më e mira, më udhëzuese dhe më pranë devotshmërisë.”[4]
20/22 (Hasen) Na ka treguar Muhamed bin Abad bin Adem nga babai i tij, nga Shubeh, nga Muhamed bin Amër, nga Ebi Selemeh, nga Ebu Hurejra, nga Henad bin es-Serij, nga Abdeh bin Sulejman, nga Muhamed bin Amër, nga Ebi Selemeh se Ebu Hurejra i tha një burri: “O djali i vëllait tim! Kur të tregoj ndonjë hadith nga i Dërguari i Allahut sal-lAllahu alejhi ue sel-lem mos sill shembuj (krahasime nga mendja jote) me të.”[5]
* (Sahih) Ebu el Hasen[6] nga Jahja bin Abdullah el Kerabisij nga Ali bin el Xhadi, nga Shubeh, nga Amër bin Murrah… – njësoj si hadithi i Aliut radijAllahu anhu.[7]
Tema: Kujdesi nga transmetimi i hadithit nga i Dërguari i Allahut sal-lAllahu alejhi ue sel-lem.
21/23 (Sahih) Na ka treguar Ebu Bekr bin Ebi Shejbeh nga Muadh bin Muadh, nga Ibën Aun, nga Muslim el Betin, nga Ibrahim et-Tejmij, nga babai i tij, nga Amër bin Mejmun se ka thënë: Kur Ibën Mesudi nuk vinte të enjten në mbrëmje, atëherë unë shkoja tek ai dhe e takoja. Asnjëherë nuk e kam dëgjuar të flasë në lidhje me diçka se: “I Dërguari i Allahut sal-lAllahu alejhi ue sel-lem ka thënë.” Por një mbrëmje tha: “I Dërguari i Allahut sal-lAllahu alejhi ue sel-lem ka thënë…” E uli kokën. Tha: “E pashë atë i cili ishte ngritur dhe qëndronte në këmbë, kopsat e këmishës së tij ishin të zbërthyera, sytë i ishin skuqur dhe damarët i ishin fryrë.” Tha: Përafërsisht këtij cilësimi, më shumë se kaq, përafërsisht, ose ngjashëm me këtë.[8]
22/24 (Sahih) Na ka treguar Ebu Bekr bin Ebi Shejbeh nga Muadh bin Muadh, nga Ibën Aun, nga Muhamed bin Sirin se; Enes bin Malik kur tregonte ndonjë hadith nga i Dërguari i Allahut sal-lAllahu alejhi ue sel-lem dhe e përfundonte, thoshte: “Apo siç ka thënë i Dërguari i Allahut sal-lAllahu alejhi ue sel-lem. “[9]
23/25 (Sahih) Na ka treguar Ebu Bekr bin Ebi Shejbeh nga Gundari, nga Shubeh, nga Muhamed bin Beshar, nga Abdurrahman bin Mehdij nga Shubeh, nga Amër bin Murrah, nga Abdurrahman bin Ebi Lejla se ka thënë: I thamë Zejd bin Erkam: Na trego (transmeto ndonjë hadith) nga i Dërguari i Allahut sal-lAllahu alejhi ue sel-lem. Tha: “Jemi në moshë të madhe dhe kemi harruar, ndërsa hadithi (transmetimi) nga i Dërguari i Allahut sal-lAllahu alejhi ue sel-lem është i rëndë dhe ka përgjegjësi të madhe.”[10]
Përktheu: Unejs Sheme
———————————————————————-
[1] Shejh Isam bin Musa Hadij në recensimin e “Sunenu Ibën Maxheh” e ka konsideruar të dobët (daif) këtë hadith. Ai thotë: Burrat e tij janë të besueshëm, porse ai është i shkëputur mes Kabijsas dhe Ubades. El Mizij në “Tuhfetul eshraf” thotë: “Ai nuk e ka takuar atë.” Ndoshta shejhu ynë Albani e ka saktësuar në bazë të dëshmuesve.
[2] “Tuhfeh” 5106.
[3] Numri i dytë rendor 20 tregon për numrin e hadithit tek origjinali.
[4] “Tuhfeh” 1017.
[5] “Tuhfeh” 15032 dhe 15070.
[6] Te botimi i shejh Isam bin Musa Hadij është Ebu el Hasen el Katani.
[7] “Tuhfeh” 10177. Shih hadithin me nr. 19 nga Ali bin Ebi Talib se ka thënë: “Kur t’ju tregohet ndonjë hadith nga i Dërguari i Allahut sal-lAllahu alejhi ue sel-lem ju mendoni atë që është më e mira, më e udhëzuara dhe më e devotshmja.”
[8] “Tuhfeh” 9492.
[9] “Tuhfeh” 1469.
[10] “Tuhfeh” 3674.
Dosje: hadith