Kush vdes pa i bërë Allahut ortak askënd, hyn në xhenet

(38) Kapitulli: Kush vdes pa i bërë Allahut ortak askënd, hyn në xhenet

Hadithi nr. 58 – Hadithi i Abdullah ibn Mes‘udit (radijallahu anhu):

I Dërguari i Allahut ﷺ ka thënē:

“Kush vdes duke i bërë shok Allahut diçka, ka për të hyrë në zjarr.”

Ndërsa unë thashë: “Kush vdes pa i bërë shok Allahut askënd, do të hyjë në xhenet.”

Transmeton Buhariu në: 23 – Libri i xhenazeve, kapitulli: Kush e thotë fjalën e fundit ‘La ilahe il-lallah’.

Hadithi nr. 59 – Hadithi i Ebu Dherr-it (radijallahu anhu):

I Dërguari i Allahut ﷺ ka thënë:

“Më erdhi një engjëll nga Zoti im dhe më dha lajmin (ose më përgëzoi) se kushdo nga ummeti im që vdes pa i bërë shok Allahut asgjë, hyn në xhenet.”

Unë i thashë: “Edhe nëse ka bërë imoralitet dhe ka vjedhur?”

Tha: “Edhe nëse ka bërë imoralitet dhe ka vjedhur.”

Transmeton Buhariu në: 23 – Libri i xhenazeve, kapitulli: Kush e thotë fjalën e fundit ‘La ilahe il-lallah’.

Hadithi nr. 60 – Hadithi i Ebu Dherr-it (radijallahu anhu):

Shkova te Profeti ﷺ ndërsa ai kishte veshur një rrobë të bardhë dhe po flinte. Pastaj erdha përsëri kur ishte zgjuar dhe më tha:

“Nuk ka ndonjë rob që thotë: ‘La ilahe il-lallah’ dhe pastaj vdes me këtë, veçse do të hyjë në xhenet.”

Unë i thashë: “Edhe nëse ka bërë imoralitet dhe ka vjedhur?”

Tha: “Edhe nëse ka bërë imoralitet dhe ka vjedhur.”

Këtë e përsërita tri herë: “Edhe nëse ka bërë imoralitet dhe ka vjedhur?”

Ai tha: “Edhe nëse ka bërë imoralitet dhe ka vjedhur, ndonëse kjo i vjen rëndë Ebu Dherr-it.”

Dhe kur Ebu Dherr (radijallahu anhu) e transmetonte këtë hadith, thoshte: “Edhe nëse kjo i vjen rëndë Ebu Dherr-it.”

Transmeton Buhariu në: 77 – Libri i veshjeve, kapitulli: Rrobat e bardha.

(39) Kapitulli: Ndalohet të vritet jobesimtari pasiqë thotë: La ilahe il-lallah

Hadithi nr. 61 – Hadithi i el-Mikdad ibn el-Esued (radijallahu anhu):

Ai tha: I thashë të Dërguarit të Allahut ﷺ:

“O i Dërguar i Allahut, çfarë thua nëse has një njeri nga jobesimtarët, dhe luftoj me të, e ai më godet njërën dorë me shpatë dhe ma pret atë, e pastaj fshihet pas një peme dhe thotë: ‘Unë iu dorëzova Allahut ( u bëra musliman).’ A ta vras pas kësaj, o i Dërguar i Allahut?”

I Dërguari i Allahut ﷺ tha: “Mos e vrit.”

Unë i thashë: “Por ai ma preu dorën, e pastaj e tha këtë pas asaj që më bëri!”

I Dërguari ﷺ tha: “Mos e vrit. Sepse nëse e vret, ai do të jet në pozitën tënde (e ka gjakun e ruajtur sepse është Musliman) para se ta vrisje, dhe ti do të jesh në pozitën e tij (gjaku yt nuk është më i ruajtur, sepse mund të gjykohesh për vrasjen e një muslimani) para se ta thoshte fjalën që tha.”

Transmeton Buhariu në: 64 – Libri i ekspeditave ushtarake, kapitulli: Më ka treguar Halifeh.

اللؤلؤ و المرجان

#Perlat dhe Koralet e haditheve në të cilat janë dakortësuar dy imamët” (Buhariu dhe Muslimi)

Përktheu: Fatjon Isufi

Dosje: Shirku