Flaka e mëkateve dhe freskia e namazit

Profeti ﷺ ka thënë: “Ju digjeni e digjeni (nga mëkatet), por kur falni namazin e sabahut ai i shuan ato (mëkatet). Pastaj përsëri ju digjeni e digjeni, dhe kur falni drekën namazi i drekës i shuan ato. Pastaj ju digjeni e digjeni, dhe kur falni ikindinë ai (namazi) i shuan ato. Pastaj ju digjeni e digjeni, dhe kur falni akshamin ai (namazi) i shuan ato. Pastaj ju digjeni e digjeni, dhe kur falni jacinë ai i shuan ato. Pastaj flini, dhe nuk shkruhet asgjë (kundër jush) deri sa të zgjoheni.”

Hadithin e transmeton Taberani në “Es-sagir” dhe “El eusat”, dhe zinxhiri i transmetimit është i mirë (hasen) sipas Mundhiriut. Ndërsa Albani e ka cilësuar hasen sahih në “Sahih et-tergib” me nr. 357.

Shpjegimi i hadithit:

Pesë kohët e namazeve janë prej veprave më madhështore të Islamit. Allahu i Madhëruar i ka bërë ato një burim të madh mirësie dhe pastrimi shpirtëror, dhe ato janë shlyese për mëkatet që kryhen ndërmjet një namazi tek tjetri.

Në këtë hadith, Profeti ﷺ thotë: “Ju digjeni e digjeni,” — domethënë përmes mëkateve, pakujdesisë, zbavitjes dhe harrimit të përmendjes së Allahut njeriu digjet nga flaka e mëkateve.

“… por kur falni sabahun ai i shuan ato (mëkatet).”

Pra namazi i sabahut i pastron dhe i shlyen mëkatet që janë bërë më parë, dhe njësoj ndodh me çdo namaz tjetër gjatë ditës.

Çdo namaz është si një dush shpirtëror që e pastron besimtarin nga papastërtitë morale dhe mëkatet që i ngjiten zemrës.

Allahu i Madhëruar thotë:

{وَأَقِمِ الصَّلَاةَ طَرَفَيِ النَّهَارِ وَزُلَفًا مِنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ}

“Fale namazin në dy skajet e ditës dhe në orët e natës, sepse veprat e mira i shlyejnë të këqijat.”

| Hud: 114.

Falja e rregullt e pesë namazeve në kohët e tyre me përulësi e përkushtim, largon mëkatet, qetëson shpirtin dhe shuan zjarrin e brendshëm të harresës dhe fajit, njësoj si uji që shuan zjarrin.

“Pastaj flini… dhe nuk ju shkruhet asgjë deri sa të zgjoheni.”

Kjo sepse pena e shkrimit të veprave ndalet gjatë gjumit dhe njeriu nuk ngarkohet me mëkate derisa të zgjohet.

Mësimet nga hadithi:

1. Vlera e madhe e pesë namazeve ditore. Ato janë burim faljeje, pastrimi dhe ndriçimi shpirtëror.

2. Namazi shlyen mëkatet e vogla për aq kohë sa shmangen mëkatet e mëdha.

3. Falja në kohë është shenjë e gjallërisë së besimit dhe kujdesit për lidhjen me Allahun.

4. Mëshira e Allahut ndaj robërve të Tij është e madhe. Ai i fal mëkatet me anë të veprave të mira dhe nuk i ngarkon me më shumë sesa mund të mbartin.

5. Namazi është mbrojtje nga zjarri i shpirtit, nga brenga, faji dhe ndëshkimi.

Përfundim:

Ky hadith përmbledh thellësinë e mëshirës së Allahut që na ka dhënë pesë oaze të përditshme pastrimi, për të shuar çdo gjurmë mëkati dhe për të ndezur dritën e besimit në zemër.

Marrë nga libri: “Ed durar es-senije”

Përshtati: Fatjon Isufi

Dosje: Mëkatet, namazi