DIJETARËT E EHLI SUNETIT
Pasuesit e Ehli Sunetit dhe Xhematit janë ata që punojnë sipas Librit të Allahut dhe Sunetit të të Dërguarit të Tij ﷺ, kapen pas tyre e thërrasin në to.
Pasuesit e Sunetit janë sahabët (shokët e Profetit ﷺ), tabiinet (brezi pas sahabëve), pasuesit e tabiinëve, e kushdo që i ndjek ata në besim, vepra e fjalë.
Çdokush që respekton Kuranin dhe Sunetin, argumentohet e bazohet në to është pasues i Sunetit.
Ai që beson në Teuhidin (njësimin) e Allahut dhe se vetëm Atij i takon adhurimi, beson në emrat dhe cilësitë e Tij, dhe e përshkruan Atë me cilësite e Tij të larta dhe emrat e Tij të bukur, pa shtrembërim, e pa përngjasim, sikurse thotë Allahu i Lartësuar:
ﵟلَيۡسَ كَمِثۡلِهِۦ شَيۡءٞۖ وَهُوَ ٱلسَّمِيعُ ٱلۡبَصِيرُ ﵞ
“Askush nuk është si Ai, dhe Ai është Dëgjuesi, Shikuesi”. (Esh-Shura: 11).
Pasuesit e Ehli Sunetit kundërshtojnë të gjitha grupet e humbura, siç janë Kaderijet, Xhehmijet, Mu’tezilet, Murxhiet, Havarixhët, Shi’at, si dhe këdo që nuk ndjek rrugën e Profetit ﷺ, sahabëve, tabiinëve dhe ndjekësve të rrugës së tyre.
DISA PIKA QË DALLOJNË EHLI SUNETIN NGA PASUESIT E BIDATIT
1- Pasuesit e Sunetit i lënë dhe braktisin mendimet dhe thëniet e njerëzve kur ato bien ndesh me Kuranin dhe Sunetin, kurse pasuesit e bidatit braktisin Kuranin dhe Sunetin në shumë raste për shkak se bien në kundërshtim me thëniet e njerëzve.
2- Ehli Suneti i peshojnë thëniet e njerëzve me Kuran dhe Sunet, kështu që çfarëdo që pajtohet me to, ata e pranojnë, e çfarëdo që i kundërshton ato, e refuzojnë.
Ndërsa pasuesit e bidatit i peshojnë argumentet me thëniet e njerëzve, e çfarëdo që pajtohet me mendimet e tyre e pranojnë, dhe çdo argument që i kundërshton ato, e braktisin dhe interpretojnë duke i nxjerrë nga konteksti i tyre.
3- Ehli Suneti kur ka mosmarrëveshje thërrasin t’i drejtohemi argumentave të Kuranit dhe Sunetit, e jo në mendimet e njerëzve, ndërsa pasuesit bidatit thërrasin që t’u drejtohemi mendimeve dhe logjikes së njerëzve.
4- Ehli Suneti nëse u vërtetohet dhe u saktesohet atyre argumenti nga i Dërguari i Allahut ﷺ, ata nuk ngurojnë ta besojnë e punojnë me të, ndryshe nga pasuesit e bidatit.
5- Ehli Suneti nuk përkatësohen te një person i caktuar përveç të Dërguarit ﷺ, ata nuk kanë asnjë emertim me të cilin njihen me të përveç emërtimit në Sunet, ndryshe nga pasuesit e bidatit, të cilët u atribohen llagapeve dhe emërtimeve të ndryshme si: Kaderijet, Xhehmijet, Mu’tezilet, Murxhiet, Havarixhët, Shi’at, etj.
6- Ehli Suneti mbështeten në hadithet e sakta dhe transmetimet e selefëve, ndërsa pasuesit e bidatit mbështeten në mendimet dhe doktrinat e tyre.
7- Ehli Suneti e njohin të vërtetën dhe i mëshirojnë njerëzit, ata kanë bashkuar mes diturisë dhe mëshirës, ndërsa pasuesit e bidatit e pergënjeshtrojnë të vërtetën dhe i shpallin njerëzit jobesimtarë.
8- Pasuesit e bidatit marrin nga Suneti atë që pajtohet me tekat e tyre -qoftë e saktë apo e pasaktë-, njëkohësisht i braktisin hadithet e sakta që nuk pajtohen me tekat e tyre, e nëse nuk janë në gjendje t’i refuzojnë, atëher mundohen ti interpretojnë në mënyrë të shtrembërt që i nxjerr ato nga konteksti i tyre.
Ehli Suneti nuk i japin askujt pozitë më të lartë se ajo që i takon, ata nuk i ngrejnë njërëzit sipër pozitës së tyre, e as konsiderojnë të pagabueshëm askë veç Profetit ﷺ, ndryshe nga pasuesit e bidatit të cilët i konsiderojnë imamët e tyre si të pagabueshëm, dhe ndjekin fjalët e tyre pa marrë parasysh nëse ato janë konfort apo bien ndesh me argumentet fetare.
Shkurtimisht, kush i përmbahet pikave të lartëpërmendura është prej Ehli Sunetit – qoftë prej dijetarëve apo jo – e kush i kundërshton ato është prej pasuesve të bidatit.
Shiko: Mexhmu el Fetaua Ibn Tejmije (3/129), (24/241), Muhtesar es-Sauaik el Murseleh (1/1603), Fetaua Nur ala Derb, Ibn Baz (3/129).
Përgatiti: Dr. Behar Hyseni
Redaktoi: Dr. Fatmir Strumi
Dosje: Dijetarët, Ehli Suneti