Mësime profetike mbi edukatën e gjumit

📘 Tihfe el-Ghifari – Allahu qoftë i kënaqur me të tregon: Ndërsa isha i shtrirë duke fjetur përmbys (mbi bark) më erdhi dikush; më preku me këmbën e tij dhe më shtyu, pastaj më tha:

‘Çohu! Ky është një pozicion fjetjeje që Allahu e urren!’

Unë e ngrita kokën, dhe ja, aty ishte i Dërguari i Allahut – paqja dhe bekimi i Allahut qofshin mbi të – i cili po qëndronte mbi kokën time.”

E transmeton Buhariu në El-Edebul Mufrad (1187) dhe e saktësoi Albani.

🖋 Shpjegimi i hadithit

I Dërguari i Allahut ﷺ ishte mësues dhe edukator për ummetin e tij; ai na e ka mësuar çdo të mirë, madje na ka sqaruar edhe pozicionet e pëlqyera apo të padëshirueshme të gjumit, në mënyrë që njeriu të ruajë shëndetin e tij në këtë botë dhe të fitojë shpërblimin në botën tjetër duke iu bindur udhëzimeve të të Dërguarit të Allahut ﷺ.

Tihfe ibn Kajs el-Ghifari – Allahu qoftë i kënaqur me të – tregon:

“Ndërsa isha i shtrirë duke fjetur përmbys (mbi bark) më erdhi dikush.”

Ky ishte zakon i disa beduinëve të ashpër në atë kohë. Ndërkohë, ai ishte duke fjetur në xhaminë e profetit.

“Më preku me këmbën e tij ”, domethënë: më shtyu me këmbën e tij për të më zgjuar.

“Pastaj më tha: ‘Çohu! Ky është një pozicion fjetjeje që Allahu e urren!’.”

Në një transmetim tjetër te Ibn Maxhes nga Ebu Dherr el Gifari – Allahu qoftë i kënaqur me të – thuhet: “Me të vërtetë kjo është mënyra e fjetjes së banorëve të Zjarrit.”

Domethënë: kjo është forma e tyre e fjetjes, ose zakoni i jobesimtarëve dhe mëkatarëve në këtë botë, ose kjo do të jetë gjendja e tyre kur të jenë në zjarr.

Kjo është një ndalesë nga fjetja në këtë pozicion.

Tikhfe – Allahu qoftë i kënaqur me të – thotë:

“Unë e ngrita kokën, dhe ja, aty ishte i Dërguari i Allahut – paqja dhe bekimi i Allahut qofshin mbi të – i cili po qëndronte mbi kokën time.”

Që tregon se këshilla vinte nga vetë Profeti ﷺ.

Transmetimet e tjera sqarojnë se suneti është që njeriu të flejë në krahun e djathtë dhe ta fillojë gjumin me përmendje të Allahut.

💎 Përfitime nga hadithi

1. Ndalohet fjetja përmbys (mbi bark).

2. Nxitja për tu larguar nga gjithçka që Allahu e urren, e që është sqaruar nga udhëzimet e të Dërguarit të Allahut ﷺ.

🩺 Problemet shëndetësore të këtij pozicioni

Fjetja përmbys (mbi bark) sjell pasoja të dëmshme, ndër to:

– Vështirësi në frymëmarrje dhe rritje të nivelit të dioksidit të karbonit (CO₂) në ajrin që rimerret dhe kështu çon në ulljen e oksigjenit.

– Shkakton presion të dëmshëm mbi shtyllën kurrizore dhe në qafë

– Është rrezik i shtuar për foshnjat, sepse mund të çojë në bllokim të rrugëve të frymëmarrjes dhe ngritje të temperaturës së trupit.

📚 “Ed Durar es Senije”

Përshtati: Fatjon Isufi

Dosje: edukatë, gjumi