Nata e Kadrit dhe dhjetë netët e fundit të Ramazanit

Hadithet e Profetit ﷺ që nxisin kërkimin e natës së Kadrit janë të shumta.

Ajo është një natë që vlen më shumë se një mijë muaj adhurim, pra më shumë se 83 vite e 4 muaj.

Në hadithe të shumta theksohet se ajo është në netët teke të dhjetëshes së fundit të Ramazanit.

Shumë dijetarë janë të mendimit se nata e Kadrit është nata e 27-të.

Megjithatë, shumë të tjerë, duke u bazuar në mbledhjen e të gjitha haditheve, vlerësojnë se ajo mund të ndryshojë nga viti në vit brenda dhjetë netëve të fundit teke.

Ky i fundit konsiderohet si mendimi më i saktë, pasi në të bashkohen të gjitha argumentet e transmetuara në lidhje me natën e Kadrit.

Sidoqoftë, është e sigurt se kjo natë bën pjesë në dhjetë netët e fundit të Ramazanit, madje në netët teke.

Profeti ﷺ na ka nxitur që gjatë këtyre netëve t’i shtojmë adhurimet tona.

Muslimani duhet të përpiqet që në këto netë të shtojë:

• Namazin e natës: Duke qëndruar para Allahut me përulësi dhe sinqeritet.
• Dhikrin dhe lutjet: Duke kërkuar falje dhe duke i shprehur Allahut nevojat e tij.
• Leximin e Kuranit: Duke medituar mbi fjalët e Allahut.
• Istigfarin: Me pendim të sinqertë për gabimet dhe gjynahet.

Prej lutjeve më të mira që mund të thotë besimtari në natën e kadrit është lutja që Profeti ﷺ ia mësoi Aishes, radijallahu anha, kur ajo e pyeti:

“O i Dërguar i Allahut, nëse e gjej natën e Kadrit, çfarë lutjeje të them? Ai ﷺ u përgjigj:

اللَّهُمَّ إِنَّكَ عَفُوٌّ تُحِبُّ الْعَفْوَ، فَاعْفُ عَنِّي

Allahumme inneke afuun tuhibbul afua feafu anni.

(O Allah, Ti je Falës, e do faljen, prandaj më fal mua!)”

(Transmeton Ahmedi, Tirmidhiu, Ibn Maxheh etj.)

Ky hadith tregon qartë se lutja në natën e Kadrit është e pranuar tek Allahu i Lartësuar. Pikërisht, kjo është arsyeja pse Aisha, radijallahu anha, kërkoi një lutje specifike që t’i lutej Allahut në atë natë të bekuar.

Ndaj mos e humb këtë mundësi!

Ndoshta kjo është nata që do të ndryshojë jetën tënde përgjithmonë; nata në të cilën falen gjynahet dhe dyert e pranimit të lutjeve janë të hapura për çdo lutës.

Dosje: Muaji i Ramazanit, Nata e Kadrit