Kur fjala dhe vepra bëhen një – Mësime nga Shejh ibn Uthejmin

Kur fjala dhe vepra bëhen një – Mësime nga Shejh Muhamed bin Salih el-Uthejmin – Allahu e mëshiroftë

– Shejhu, nëse mungonte nga mësimdhënia apo nga imamllëku në xhaminë ku shërbente, llogariste përqindjen e mungesës dhe e zbriste nga paga e tij, pa pranuar që ta marë atë, sado e shkurtër të ishte mungesa.

-Nëse vonohej në institutin ku jepte mësim edhe për vetëm disa minuta, e shënonte këtë në regjistrin e pranisë dhe shkruante: “Pa arsye.”

– Një herë, ai u tha nxënësve të tij: “Kush mendon se i kam bërë padrejtësi në ndonjë notë gjatë korrigjimit, le të më vijë.” Njëri prej tyre e takoi shejhun për një gjysmë pike, dhe ai ia shtoi notën.

– Një burrë i kërkoi hua për udhëtim. Shejhu ia dha paratë dhe i kërkoi ta shoqëronte. Kur mbërritën, shejhu nguli këmbë që t’i paguante shpenzimet e udhëtimit. Por burri refuzoi, ndërsa shejhu i tha: “Sikur të mos të kisha dhënë hua, do të ishte e lejuar, por tani kam frikë se mos bëhet hua që sjell përfitim.”

– Një herë ai po udhëtonte me një mik të tij, por makina kishte shumë defekte. Shejhu zbriti dhe i tha: “Ti qëndro në vendin tënd,” pastaj e shtyu makinën derisa u ndez dhe filloi të ecte.

– Një ditë shejhu përdori bojën e institutit. Kur deshi të largohej, ai e zbrazi bojën dhe tha: “Kjo është boja e institutit, nuk lejohet ta përdorim jashtë tij.”

– Një princ i kërkoi leje për t’i ndërtuar një shtëpi. Por shejhu iu përgjigj se xhamia kishte nevojë për rindërtim. Kjo fjalë u bë shkak që xhamia të rindërtohej, e cila më pas mori emrin e shejhut.

– Atij iu dhurua një ndërtesë, por nuk e përdori për vete; e shndërroi në shtëpi për studentët.

– Shpesh në namazin e sabahut shkonte zbathur, për të ringjallur një sunet të Profetit ﷺ, siç ka transmetuar Fudale bin Ubejd: “I Dërguari i Allahut ﷺ na urdhëronte të ecim zbathur ndonjëherë.” (Transmeton Ebu Daudi – dhe hadithi është sahih).

– Në rrugë për në namazin e sabahut lexonte pjesën e tij të Kuranit, dhe nëse nuk e përfundonte, ndalej te dera e xhamisë derisa ta mbaronte, pastaj hynte brenda.

Ky ishte shejh Muhamed bin Salih el-Uthejmin – Allahu e mëshiroftë.

Burimet:

1- “Metoda e Shejh el-Uthejminit në arsimin universitar” – Abdullah et-Tajjar.

2- “Ibn Uthejmini, imami zahid” – Nassar ez-Zehrani.

3- “Thesare nga tregimet e Shejh Ibn Uthejminit”

Përktheu: Fatjon Isufi

Dosje: fjala, veprat e mira