Përgatitja para hyrjes së muajit të Ramazanit

*Përgatitja me dije (aspekti teorik)

Besimtari përgatitet duke mësuar dispozitat e këtij muaji, duke ndjekur mësimet dhe ligjëratat fetare, sidomos ato që lidhen me rregullat e agjërimit.

Kërkimi i dijes fetare është obligim në vetvete dhe ndër veprat më të dashura te Allahu i Lartësuar.

Mjafton si tregues për vlerën e dijes fjala e Allahut:

“Allahu do t’i ngrejë në grada të larta ata që besuan prej jush dhe ata të cilëve u është dhënë dija.” (El-Muxhadele: 11)

Gjithashtu, Profeti ﷺ ka thënë:

“Atij që Allahu ia do të mirën, ia mundëson kuptimin e fesë.” (Transmetojnë Buhariu dhe Muslimi)

Ky obligim bëhet akoma më i theksuar kur nevojitet praktikisht, si për shembull: mësimi i rregullave të agjërimit para hyrjes së Ramazanit, apo mësimi i rregullave të haxhit para kryerjes së tij, e kështu me radhë.

*Përgatitja shpirtërore dhe praktike

Muslimani përgatitet për këtë muaj para se ai të vijë.

Ai i paraprin ritualeve të Ramazanit duke shtuar agjërimin vullnetar, veçanërisht në muajin para tij, ashtu siç vepronte Profeti ﷺ. Gjithashtu, ai shpeshton leximin e Kuranit, shton namazet nafile, përmendjen e Allahut, dhënien sadaka, Istigfarin …, etj.

Përgatitja për Ramazan fillon para hyrjes së tij.

Besimtari fillimisht pastron zemrën e tij nga gjithçka që nuk i ka hije, e adhuron Allahun me sinqeritet dhe duke pasuar rrugën e Profetit ﷺ , i kërkon falje Allahut për gjynahet e tij, shkëputet dhe distancohet nga gjithçka që e hidhëron Allahun.

Gjithashtu prej veprave të pëlqyera është shtimi i agjërimit gjatë maujit Shaban, sikurse Profeti ﷺ vepronte.

Aisha (Allahu qoftë i kënaqur me të) tregon se nuk e ka parë Profetin ﷺ të agjëronte në ndonjë muaj tjetër, përveç Ramazanit, aq shumë sa agjëronte në Shaban; madje ai e agjëronte Shabanin thuajse të gjithin.

(Transmetojnë Buhariu dhe Muslimi)

Shumë prej selefëve e quanin muajin Shaban (muaji para Ramazanit) “muaji i Hafizave”, pasi gjatë tij – sidomos imamët e xhamive – fillonin përsëritjen intensive të Kuranit, në mënyrë që të ishin të përgatitur për namazin e Teravive dhe namazin e natës në Ramazan.

Habib bin Ebi Thabit (v. 119H) dhe Seleme bin Kuhejl (v. 122H) tregojnë se njerëzit (në kohën e tabiinëve) e quanin muajin Shaban: Muaji i hafizave.

(Letaiful Mearif, fq. 242)

Ndaj, ai që dëshiron ta shfrytëzojë Ramazanin siç duhet, le ta nisë përgatitjen që para ardhjes së tij, me njohjen e dispozitave të tij, me adhurim të sinqertë dhe me pastrim të zemrës.

Lusim Allahun e Lartësuar të na mundësojë ta arrijmë Ramazanin të përgatitur, ta jetojmë me vepra të mira dhe ta përfundojmë me falje, mëshirë dhe shpëtim nga zjarri i Xhehenemit!