Besimi i muslimanëve rreth Isait (Jezusit)

– Isai عليه السلام është rob nga robërit e Allahut, të cilit Allahu i Lartësuar i dhuroi gradën e pejgamberllëkut dhe të shpalljes hyjnore.

Allahu i Madhëruar thotë: “Ai nuk ishte tjetër veçse një rob të cilin Ne e begatuam dhe e bëmë shembull për bijtë e Israilit.” | Ez-Zuhruf: 59.

Hafidh Ibn Kethiri, Allahu e mëshiroftë, thotë: Fjala e Tij: “Ai nuk ishte tjetër veçse një rob të cilin Ne e begatuam”, do të thotë se Isai عليه السلام nuk ishte tjetër veçse një rob nga robërit e Allahut, të cilin Allahu e begatoi me profetësi dhe shpallje.

📚 Tefsiri i tij 7/232.

– Ai u krijua pa baba.

Allahu i Lartësuar thotë: “Shembulli i Isait tek Allahu është si shembulli i Ademit: e krijoi prej dheu, pastaj i tha “Bëhu!”, – dhe ai u bë. E vërteta është nga Zoti yt, prandaj mos u bëj nga dyshuesit.” | Al Imran: 59–60.

Hafidh Ibn Kethiri tregon se Allahu i Lartësuar thotë: “Shembulli i Isait tek Allahu” – për nga fuqia e Allahut në krijim, – “është si shembulli i Ademit”. Sepse Allahu e krijoi Ademin pa baba dhe pa nënë, por “e krijoi prej dheu, pastaj i tha: ‘Bëhu!’ – dhe ai u bë.”

Ai që e krijoi Ademin është edhe më i aftë të krijojë Isain. Nëse të krishterët pretendojnë birësinë për Isain për shkak se u krijua pa baba, atëherë kjo do të ishte edhe më e mundshme për Ademin. E megjithatë, dihet unanimisht se kjo është e pavërtetë. Prandaj, pretendimi i tillë për Isain është edhe më i kotë dhe më i prishur.

Mirëpo Allahu i Lartësuar deshi t’iu tregojë krijesave fuqinë e Tij: e krijoi Ademin pa mashkull e pa femër, krijoi Havën nga mashkulli pa femër, krijoi Isain nga femra pa mashkull, dhe krijoi pjesën tjetër të njerëzimit nga mashkulli dhe femra.

Për këtë arsye, Ai në suren Merjem tha: “…që ta bëjmë atë shenjë për njerëzit”, dhe këtu thotë: “E vërteta është nga Zoti yt, prandaj mos u bëj nga dyshuesit”. Domethënë se ky është besimi i vërtetë për Isain, nga i cili nuk ka shmangie dhe përveç të cilit nuk ka të vërtetë tjetër. E çfarë ka pas së vërtetës veçse humbje?

📚 Tefsiri i tij 2/49.

– Ai është shenjë paralajmëruese për orën.

Shpjegimi i fjalës së Allahut: “Dhe ai është shenjë (paralajmëruese) për orën.” | Ez-Zuhruf: 61.

Dijetari i madh dhe mufesiri Muhamed el Emin esh-Shenkiti, Allahu e mëshiroftë, thotë:

E vërteta e saktë është se përemri në fjalën “dhe ai” i referohet Isait, e jo Kuranit dhe as Profetit ﷺ.

Kuptimi i fjalës së Tij: “Dhe ai është shenjë për orën”, sipas mendimit të saktë që e dëshmon Kurani i Madhëruar dhe suneti muteuatir, është se zbritja e Isait në fund të kohës duke qenë i gjallë, është shenjë e orës. Pra është shenjë e afrimit të saj, sepse ajo (ardhja e tij) është prej shenjave të mëdha të kiametit.

📚 “Edau’l-bejan” 7/280.

Këtë e përforcon ajo që transmetohet në “Musned” nga Ibn Abasi, Allahu qoftë i kënaqur me të, për fjalën e Allahut: “Dhe ai është shenjë për orën”, ku ka thënë: “Ai” ka për qëllim ardhjen (zbritjen) e Isait, birit të Merjemes, para Ditës së Kiametit.

Shejh Ahmed Shakiri ka thënë: Senedi i këtij transmetimi është i saktë.

– Ithtarët e librit do besojnë në fenë e saktë para vdekjes së tij.

Këtë e sqaron edhe ajeti në suren En-Nisa: “Nuk ka asnjë nga ithtarët e Librit që nuk ka për të besuar në të para vdekjes së tij.” | En-Nisa: 159.

Shejh esh-Shenkiti thotë: Domethënë: do të besojnë në Isain para vdekjes së Isait. Kjo është e qartë se Isai është i gjallë në kohën e zbritjes së këtij ajeti dhe se ai nuk do vdesë derisa ithtarët e Librit të besojnë në të. Dhe dihet se ata nuk do besojnë në të përveçse pas zbritjes së tij në tokë.

Më pas thotë: Përemri në fjalën “para vdekjes së tij” i referohet Isait. Ndërsa mendimi se i referohet ithtarëve të Librit është në kundërshtim me kuptimin e qartë të Kuranit, dhe për të nuk ka argument as nga Kurani e as nga Suneti.

📚 “Eduau’l-Bejan” 7/283–284.

Këtë e përforcon edhe ajo që transmeton Ibn Xheriri në tefsirin e tij nga Ibn Abasi, Allahu qoftë i kënaqur me ta, për fjalën: “që nuk ka për të besuar në të para vdekjes së tij”, se ka thënë: “Para vdekjes së Isait, birit të Merjemes.”

Ibn Kethiri ka thënë: Zinxhiri i këtij transmetimi është i saktë.

Për më tepër dobi, shiko:

“Shenjat e Kiametit” i Jusuf el Uabil, fq. 337.

“Hadithet e shenjave të Kiametit dhe kuptimi i tyre” fq. 592.

Përshtati: Fatjon Isufi

Dosje: Profetët