Si filloi jeta dhe krijimi?

Ishte Allahu i Lartësuar në amshim dhe para Tij nuk ka qenë asgjë, pastaj Ai solli në ekzistencë krijesat në një kohë kur i gjithë universi nuk ekzistonte. Allahu i Lartmadhërishëm e krijoi universin pa asnjë shembull të mëparshëm.

Ai thotë: “Në të vërtetë, Zoti juaj është Allahu që krijoi qiejt dhe tokën për gjashtë ditë, e pastaj u ngrit mbi Fron. Ai me errësirën e natës e mbulon ditën dhe dita e ndjek natën nxitimthi. Dielli, hëna dhe yjet i përulen urdhrit të Tij. Vetëm Atij i përket krijimi dhe urdhërimi. Qoftë bekuar Allahu, Zoti i botëve!” | El A’raf: 54.

Transmeton Buhariu në Sahihun e tij nga Imran ibën Husajni, se Profeti, sal-lAllahu alejhi ue sel-lem, ka thënë: “Ka qenë Allahu dhe nuk ka qenë asgjë para Tij. Arshi i Tij ishte mbi ujë. Pastaj krijoi qiejt dhe tokën dhe shkroi çdo gjë në Libër.” (7418)

Allahu është Ai që e krijoi Ademin, babain e njerëzimit.

Në Sahihun e Muslimit, nga hadithi i Ebu Hurejrës përcillet se Pejgamberi, sal-lAllahu alejhi ue sel-lem, ka thënë: “Dita e premte është dita më e mirë në të cilën ka lindur dielli. Në këtë ditë është krijuar Ademi, në të është futur në Xhenet dhe po në këtë ditë është nxjerrë prej tij.” (854)

Allahu i Latësuar e ka përmendur krijimin e njeriut në Kuranin Famëlartë, dhe ka thënë:

“Me të vërtetë, Ne e kemi krijuar njeriun prej esencës së baltës.

E pastaj e bëmë atë pikë fare dhe e vumë në një vend të sigurt (mitër).

E mandej pikën e farës e bëmë droçkë gjaku, e pastaj e bëmë copëz mishi pa formë. Mandej me atë mish bëmë eshtrat, pastaj i veshëm eshtrat me mish dhe pastaj e bëmë atë (njeriun) krijesë tjetër (duke i futur shpirtin). Qoftë i lartësuar Allahu, Krijuesi më i përsosur!”

| El Muminun: 12-14.

Po ashtu, Allahu i Lartësuar thotë:

“O njerëz! Frikësojuni Zotit tuaj i Cili u krijoi prej një njeriu të vetëm, e prej atij krijoi bashkëshorten e tij, e prej këtyre të dyve krijoi shumë meshkuj e femra.”

| En Nisa: 1.

Në këto ajete kuranore Allahu ka përmendur fazat dhe etapat e jetës së njeriut, që nga fillimi i krijimit të tij e deri në etapën e fundit.

Ai ka përmendur origjinën e krijimit të babait të racës njerëzore Ademit, dhe se origjina e tij ishte “prej esencës së baltës”. Domethënë nga një esencë që është nxjerrë dhe marrë nga e gjithë toka, e për rrjedhojë bijtë e tij dolën sipas natyrës së tokës: prej tyre ka të mirë,m të këqinj dhe të ndërmjetëm, ka të butë, të vrazhdë dhe të ndërmjetëm.

Allahu ka përmendur gjithashtu krijimin e qiejve dhe të tokës dhe të gjithçkaje që gjendet mes tyre, kur thotë:

“Ai i ka krijuar qiejt pa shtylla të dukshme, ka vënë male të palëvizshme në tokë që ju të mos lëkundeni, dhe ka shpërndarë në të gjithfarë gjallesash. Ne e zbresim ujin nga qielli dhe nëpërmjet tij kemi bërë të mbijë çdo lloj bime e mirë.” | Lukman: 10.

Salavatet dhe selamet qofshin për Muhamedin, familjen dhe të gjithë shokët e tij!

Përshtati: Rexhep Milaqi

Dosje: Histori, krijimi, Kur'ani