Një veprim që mund ta bëjë abdesin të pavlefshëm

Një nga detyrimet e abdesit është larja e duarve nga majat e gishtave deri te bërrylat, madje duhet larë edhe pak më lart se bërryli për t’u siguruar se ai është larë plotësisht.

Allahu i Lartësuar thotë në Kuran:

“O ju që besuat! Kur doni të falni namazin, lani fytyrat dhe duart tuaja deri në bërryla. Fshijeni kokën (me dorë të lagur) dhe lani këmbët tuaja deri në kyçe.” | El Maide: 6.

Ajeti kuranor tregon se katër gjymtyrët që duhen larë apo duhet t’iu jepet mes’h janë:

• Larja e fytyrës.

• Larja e duarve deri në bërryla.

• Mes’hi i kokës (fshirja e saj).

• Larja e këmbëve deri në kyçe.

Disa njerëz duke qenë se i lajnë duart deri te kyçet në fillim të abdesit, mjaftohen me atë larje. Më pas, pasi lajnë fytyrën e nisin larjen e krahëve vetëm nga kyçet e dorës deri te bërryli, duke e lënë pëllëmbën dhe gishtat pa i larë sërish.

Pikërisht ky veprim e bën abdesin të pavlefshëm, pasi që konsiderohet se nuk i larë duart të plota sikurse është urdhëruar në ajetin kuranor. Ose më saktë ka larë pjesën nga majat e gishtave deri të kyçet në fillim të abdesit, para larjes së fytyrës, e më pas ka larë pjesën nga kyçet e dorës deri te bërryli, dhe në këtë mënyrë nuk ka respektuar radhitjen e përcaktuar në Kuran.

Marrja e abdesit sipas radhës së përmendur në Kuran është obligim.

Të gjitha hadithet që përshkruajnë abdesin e Profetit, sal-lAllahu alejhi ue sel-lem, e konfirmojnë këtë radhitje. Nëse kjo radhë cënohet ose gjymtyra nuk lahet e plotë në kohën e vet, abdesi konsiderohet i pavlefshëm sipas shumë dijetarëve.