Suneti është shpallje nga Allahu sikurse Kurani – 1 –

 Shtjellimi i argumenteve që vërtetojnë se suneti është shpallje ashtu si Kurani.

Hyrje:

Nuk njihet ndonjë profet tjetër përveç profetit Muhamed ﷺ, jeta dhe suneti i të cilit t’i jetë kushtuar një kujdes kaq i madh, hadithet e tij të jenë numëruar me aq saktësi dhe të jenë regjistruar me përpikmëri të jashtëzakonshme.

Allahu i Lartësuar ka bërë shumë shkaqe dhe faktorë për ruajtjen e Sunetit të cilat hyjnë në kaderin e Allahut të Lartësuar, për ruajtjen e Kuranit, dhe gjithashtu ruajtjen e shpjegimit të Kuranit.

Kjo çështje është e kuptueshme dhe e ndërlidhur, sepse Kurani fisnik lidhet ngushtë me personin e Profetit ﷺ nga dy anë.

Nga njëra anë për shkak se ai e ka marrë nga Allahu i Lartësuar dhe ia ka përcjellë umetit, ashtu siç e ka marrë në fjalë dhe në kuptim.

Dhe nga ana tjetër, se Allahu i Lartësuar ia ka besuar atij detyrën të sqarojë për njerëzit atë që Ai ka dashur me fjalët e Tijﷻ.

Nga këto dy aspekte është krijuar një lidhje e fortë midis Kuranit dhe Sunetit, pra një lidhje e pandashme nga njëra-tjetra. Prandaj kush përpiqet të argumentohet vetëm me Kuranin duke lënë pas Sunetin, ose me Sunetin duke lënë pas Kuranin, është si ai që përpiqet të ndajë degët e pemës nga rrënja, ose të ndajë të afërmin nga i afërmi i tij.

Çdo përpjekje për t’u mjaftuar me njërin burim duke përjashtuar tjetrin është një përpjekje e kotë, një ecje në verbëri dhe një dalje nga rruga e drejtë, sepse Suneti është binjaku i Kuranit dhe shoqëruesi i tij në argumentim dhe dëshmi.

( Shiko librin “Es-sunetu en nebevijeh vahjun”, i autorit Husejn ibn Muhamed Ajet Seid, fq. 43.)

Argumente nga Kurani Famëlartë se Suneti është shpallje hyjnore

Shpallja që i është zbritur Pejgamberit ﷺ nuk kufizohet vetëm në Kuranin fisnik, por ajo është gjithëpërfshirëse për Kuranin dhe Sunetin. Ka shumë argumente që tregojnë për këtë, ndër to:

1. Fjala e Allahut të Lartësuar:

وَمَا يَنطِقُ عَنِ ٱلۡهَوَىٰٓ ۝ إِنۡ هُوَ إِلَّا وَحۡيٞ يُوحَىٰ [النجم: 3-4]

 “Ai (Muhamedi  ﷺ) nuk flet sipas dëshirës së vet, por ajo (që thotë ai) nuk është tjetër veçse shpallje që i shpallet.” | En Nexhm: 3–4.

Muhamed ibën Nasr el Meruezi duke u bazuar në këtë ajet, ka thënë: “Prandaj i Dërguari i Allahut ﷺ shpalli ligjet (e fesë) dhe sunetet me lejen e Zotit të tij dhe me shpalljen e Tijﷻ, dhe jo nga vetja e tij. Allahu ka dëshmuar për këtë duke thënë:

“Shoku juaj (Muhamedi  ﷺ)  nuk ka humbur e as nuk ka devijuar dhe ai nuk flet sipas dëshirës së vet. Ajo (që thotë ai) nuk është tjetër veçse shpallje që i shpallet.” | En Nexhm: 2-4.

(Libri “Es-sunneh” fq. 14. Shiko dhe librin “Ue ma jentiku anil heua”, merkez “Ihsan lidirasat es-sunetin en nebeuijeh” fq. 12.)

Ebu Hajani ka thënë: “Kjo tregon se sunetin ia ka zbritur Allahu të Dërguarit të Tij ﷺ”.

(Tefsiri “El bahr el muhit” 4/491.)

Et Tufiu ka thënë: “Kjo dëshmon se ai (Pejgamberi ﷺ) nuk gjykonte me ixhtihad (mendim personal) por me shpallje, dhe se suneti që ka ardhur nga ai është shpallje që i shpallej atij”.

(“El isharat el Ilahije ila el mebahith el usulije” (3/291). Gjithashtu shiko “Ahkamu el Kuran” i El Xhassas (3/345), “Sherh Sahih el Buhari” i Ibn Battal (13/573), dhe “Fet’h el Kadir” (5/265).

Imam Buhariu ka transmetuar në Sahihun e tij me nr. 7274, nga Ebu Hurejra, se Pejgamberi ﷺ ka thënë:

“Nuk ka ndonjë profet prej profetëve vetëm se i është dhënë ndonjë mrekulli që njerëzit i kanë besuar për shkak të saj, ndërsa ajo që më është dhënë mua është shpallja që Allahu më ka shpallur, dhe shpresoj të kem më shumë ndjekës në ditën e Kiametit”.

Pejgamberi ﷺ sqaron në këtë hadith se mrekullia e tij më e madhe është shpallja (uahji). Kjo shpallje nuk kufizohet vetëm në Kuranin Famëlartë i cili është mrekullia më e madhe, më e dobishmja dhe më e përhershmja ngase përmban thirrjen, argumentin dhe përfitimin e vazhdueshëm prej tij deri në fund të kohës. Por përfshin gjithashtu edhe sqarimin dhe shpjegimin e Kuranit që Allahu e bëri nëpërmjet gjuhës së të Dërguarit të Tij ﷺ në Sunetin e tij të pastër.

(Shiko librin “Es sunetu en nebevijeh vahjun  minAllah mehfudhatun kel Kuranil kerim”, i autorit Ebu Lubabe Husejn, fq. 18.)

Vijon…

Përgatiti: Dr. Behar Hyseni

Dosje: hadith, Kurani, Profeti, Suneti